گونون غزلی

غمگین

عؤمرومون لاپ خسته یاتان گونلری دی

بئلینه غم یوکونو چوخلو چاتان گونلری دی

یازیغین داشقاسی چؤنموش، قیچی سینمیش آتی نین

چئوریلیب تختی آشیب، یئرده یاتان گونلری دی

حیاتین سون چاغی، گون لرده بولودلوقدا کئچیر

بختینین اولدوزو گؤیلرده باتان گونلری دی

شیطانین نوخدا قیران قاطیری، سونجوقلاماقدا

هر یئری بنده ووروب، شیللاق آتان گونلری دی

گوزلیم وار – یوخونو نرد هوسده اودوزوب

گؤز تیکیبدیر شَتَله، چؤرتگه قاتان گونلری دی

منی بو اورتادا ائتمیش او گوناهکار، ایشه باخ

آختاریر بیر باهانا، غشّی توتان گونلری دی!

شئخ سلیم لر بازاری ایستی دی تندیرلر تک

ال ائنینده کبابی لوپ – لوپ اوتان گونلری دی

یالقیز اؤز شعر اوجاغیندا بیشیرنده بو سؤزو

قصاب ائششک اتینی خلقه ساتان گونلری دی

 

"یالقیز"


موضوعات مرتبط: تورکی شعر ، یالقیز
برچسب‌ها: شعر تورکی , یالقیز

تاريخ : یکشنبه شانزدهم شهریور 1393 | 14:45 | نویسنده : احمد |
"منيم ده وار هوسيم" 

من ده بير بولبولودوم چوخ وارايدي گول هوسيم

گولون عشقينده چاتاردي منيم افلاكه سسيم
بس كي فرياد ائله ييب عشقيمي اظهار ائله ديم
ليك گوللرده وفا گؤرمه ديم، اؤلدو هوسيم
چيغيريب سالديم هاراي، داديما بلكه يئته لر
نه سسه سس وئرن اولدو، نه ده فرياد رسيم
ائله ديم بسكي فغان، خسته دوشركن يورغون
ايندي ده واردي هله، تنگه دوشوبدور نفسيم
او بوداقلارداكي آزاد، اوخويارديم گول اوچون
نه بيلئيديم اولاجاقدير منيم آخر قفسيم
بولبوله ناله دي قسمت، گوله گولمك، نه دئييم
بو نصيبه، بو پايا قسمته كيم اولدو قسيم
دولانارديم باشينا اؤز گولومون، تيتررديم
اسمه سين، راضي اولارديم يئل اسنده من اسيم
ييغيشيب سينه مه غملر قالانيب بير داغ اولوب
عؤمرومون آخيري بو غم شله سي بسدي، بسيم
دولدو پرونده عشقيم غم ايله باغلاندي
چوخ شكايت ائله ديم اولمادي بير دادرسيم
ايندي من سانكي قوشام كنج قفسده، سيخيليب
نه قاناد واردي اوچام، وار نه يووام كي تلسيم
مني ده بو قفسه سالديرانيم اولدو هوس
اودو فرياد ائدريم آي سنه لعنت هوسيم
يالقيزام، يوخدو اوره كدن گر اؤلم آغلايانيم

عالم عشقده تك جان وئره رم يوخدو كسيم

"استاد یالقیز"


موضوعات مرتبط: تورکی شعر ، یالقیز
برچسب‌ها: تورکی شعر , یالقیز

تاريخ : جمعه ششم دی 1392 | 0:55 | نویسنده : احمد |
آلدانما - اینانما
یا رب، جانا گلدیم، بو یالان سؤزلر الیندن
سیرتیق، حیاسیز، بیر پارا شوخ گؤزلر الیندن

مین فیرتانا قووزاندیران هر قالیبه دوشموش
قانلار تؤکن، ائولر داغیدان سؤزلر الیندن

تئز وئر اوزومون اؤرتوگون، آل جانیمی، قورتار
یارب اوزه گیرمیش، حیاسیز اوزلر الیندن

باطینلری دوزلر، دئیه بیلمز کی یالان سؤز
ای وای بو یامان ظاهری خوش دوزلر الیندن

یوز یول دئمیشم اؤز-اؤزومه سن ده اوتانما
آلدانما، اینانما حذر ائت هیزلر الیندن

بیر یول، ایکی یول بس دئییل اون یول؟ داها بسدیر
سايدیقجا خجالت چکیرم یوزلر الیندن

یالقیز نه دیر علّت، نییه دوزلر باشارانمیر
نئیلیر چیخادانمیر ایشی نادوزلر الیندن

شاعیر: یالقیز


موضوعات مرتبط: تورکی شعر ، یالقیز
برچسب‌ها: تورکی شعر , یالقیز , حمید صباغ ایرانی

تاريخ : جمعه سوم خرداد 1392 | 12:54 | نویسنده : احمد |
.: Weblog Themes By BlackSkin :.